Inbox...

 عالفيس بوك سبت رسايل
زهقان من كترها
دى كلام فى الحال المايل
شبه بعض كلها
قررت اسيبها مدة
ولا عدت فتحتها..
لحد ما جيت فى يوم
وقلت أعدها
بعـــِـد فى الــــرسايل
وصلت لسكور هايل
1580
2460
3534
وصلت لرقم قياسى
ببص فى الرســايل
معظمها مش أساسى
شوية إعلانات
توبيكات..مقالات
وشوية تفاهات
لحد مالقيت رسالة
حبيبى ادانى معاد
ساعتها بس عرفت
ايه سر البعاد...

single وأفتخر

بعد 3 أيام يأتى عيد الحب -أو الValantine's day كما يشتهر به-،ومعظم من أعرف من أصدقاء مرة واحدة كله غير الstatusعلى الفيس بوك وبقواIn a relationship،ومازلت أنا زى مانا single،كله عاملى فيها تامر حسنى ومقضيها وانا لوحدى-شوية حقد بقى عشان يتهنوا صح-،بس برضه مع ذلك أنا فخور بكونى سينجل وبحمد ربنا،لأنى اكتشفت مؤخرا ان للعزوبية والوحدة مزايا،زى كدة:
1-بتوفر فلوس الهدية والعزومة و..و..إلخ"يناسبك هذا الأمر اذا كنت من ذوى العرق الدمياطى أو الشرقاوى كريم العنصرين"
2-مش مضطر تروح مكان كله أحمر فى أحمر،يستفزك هذا المنظر بالذات لو كنت زملكاوى-الحمد لله على انى أهلاوى فمش فارقة معايا-
3-كونك اتعودت على انك سينجل والأيام اللى زى دى تعدى عليك كتير،فالمفروض انك تكون اكتسبت مناعة من أى شعور سلبى مباشر أو غير مباشر ناحية أى تجربة عاطفية فاشلة،فمتحسش بعذاب الحب والوداع ولا أى هتش وكلام فاضى من اللى بنسمع عنه ده.
4-أضف إلى الميزة السابقة انك كدة مش هاتقع فى أى واحدة تحبها وخلاص،لازم تبقى ع الفرازة.
5-يوم زى ده يعلمك تبقى سينجل ناجح،بحيث انك بدل ماتقضى اليوم ده فى أحاسيس ومشاعر وكلام فاضى من ده،تعيش مع الشلة السينجل-لازم تبقى محضر شلة من دول-وتقعدوا تتريقوا ع الحبيبة والكوبلز،وتقضوها ضحك للصبح،وبكدة تبقى رفعت روحك المعنوية بدل ما تحبطها.
6-ودى بجد بقى،ليه تقضى يومك فى عصيان ربنا عشان واحدة،لما ممكن تقضيه فى طاعته واليوم ده يكون سبب دخولك الجنة عكس الحبيبة،يغيظوك فى الدنيا تغيظهم فى الآخرة،والعبرة بالخواتيم على رأى عصام الشوال
أما أنا..وحدى أنا،بس مش مشكلة،لأن اليوم ده غالبا والله أعلم هاعتبره عيد الضحك والمسخرة من كتر الضحك اللى هاضحكه
وحتى نلتقى مجددا،اقعدوا بالعافية

مصر هى أمى

ولدت وتربيت على أن مصر هى أمى،وكذلك معظم جيلنا


طيب أنا عايز أعرف،لما مصر هى أمى:


1- طب هى خلفتنى ونسيتنى ولا ايه؟


2- أمال اللى فى البيت دى تبقى مين؟


3-أمال مصر مابتدينيش مصروف ليه؟


4-ليه المصريين بيتمرمطوا وهما فى حضن امهم؟


5-لما مصر تبقى أمى،ليه أرضى لأمى انها تبقى مدخنة ومابتستحماش؟-قصدى التلوث-


وأخيرا:
"يابلدنا يابلد....هو من امتى الولد...بيخاف من امه...لما تضمه"
                                                                  ايمان البحر درويش

أغنية للملحن أحمد منيب ومحمد منير فى قعدة سمر-ربك هو العالم

للتحميل:


http://www.megaupload.com/?d=OFL22RB2

حتى ستاربكس طلع اسرائيلى؟؟؟؟

مساء الفل
أخيرا حصلت على أجازة نصف السنة عشان أفضى وأعود للكتابة فى المدونة
هو صحيح محدش بيقرا بس ربنا يبعت
المهم
نبأ غريب قرأته فى إحدى جروبات الفيس بوك
ان مقاهى ستاربكس واسعة الانتشار مالكوها اسرائيليون الجنسية
وفى حملة قامت لمقاطعتها وبدأت فى الاسكندرية
طيب
هى الحكاية دى اتكررت كتير قوى،ومنها ما نجح بقوة زى بتاعة سلسلة سوبر ماركت سنسبرى اللى اختفى من شوارع مصر حتى بعد محاولة التحايل عليها بتغيير الاسم الى"A1"ولكن الخدعة لم تنطوى على الشعب المصرى الفهلوى لأن احنا اللى  دهننا الهوا دوكو ولبسنا المعزة مايوه 2pieces وخلينا تركمانستان تغنى لعمرو دياب وكده
هو ليه أى حد يقول أى حاجة نصدقها؟،نقرا ان البيبسى اسرائيلى،وان كلمة pepsi اختصار لـ "pay every pince to save Israel" نصدق،وتيجى تشربلك كوباية يجيلك واحد يخليك تبقى عايز -لامؤاخذة- ترجع اللى شربته،يقعد يقولك البيبسى مقاطعة وفيه دهن خنزير وبيجيب هشاشة عظام-مع انك لما بتروح لدكتور عظام بتلاقى قدامه كوباية البيبسى قد كده-وبيجيب cancerوبلاوى سودة،مش حرام برضه؟
انا مش فاهم ليه الناس بتصدق أى كلام يتقال من غير نقد أو تحليل ولا حتى تفكير-يعرف عند علماء المنطق بالاستهواء-،أى كلمة عن ممثل أو مغنى تنتشر بسرعة البرق،أى كلمة فى شرف ممثلة أو أى صورة متركبة-وعلى فكرة سهل قوى الواحد يتعلمها- ومش ولابد ومحطوط عليها وش واحدة مشهورة  تتنقل بالبلوتوث من واحد للتانى وفى ظرف24 ساعة تلاقيها على 70% من موبايلات مصر
بلد بتاعة اشعاعات صحيح