٢٥ ديسمبر ٢٠٠٩

تهييس آخر السنة

بصراحة انا زهقت من السياسة، كلام كتيييير ومع ذلك نو ديفرانس-بمعنى لا اختلاف بس انا بحب اتفزلك-، وبما اننا دخلنا سنة هجرية جديدة وداخلين على أخرى ميلادية جديدة برضه، فانا حابب أديها شوية حاجات فى اللذيذ

طقم أسئلة هاياكل منك حتة:

1-ليه وزارة التعليم لغت مادة التدبير المنزلى؟ على الأقل كانوا المتجوزين اترحموا من فترة السنتين تلاتة اللى مابياكلوش فيها تقريبا أكل بيتى لأن مراتاتهم مابتطبخش فيها حلو معللات بالقول الشائع"لسه بتعلم الطبيخ...لازم تستحملنى شوية ياحبيبى"

2- ليه دايما المتجوزين مضطرين يردوا على مراتاتهم بـ"يا حبيبتى الأكل حلو قوى وكل حاجة بس
ناقص ملح/الرز نى/الأكل كله نى/انتى طالق"

3- ليه على الرغم من كل الليلة دى كلها برضه بنلاقى المتجوزين بيتخنوا فى أول الجواز-مش يمكن من الدليفرى؟-

4-اذا كان مفرد الفلاسفة فيلسوف، فما مفرد المناطقة؟"والمناطقة -على حد قول كتاب فلسفة اولى ثانوى-هم علماء المنطق"
السؤال الأهم، هل معنى ذلك ان "كبير المناطجة طخ خلفاوى ابن الدهشان عيارين فى نافوخه"؟

5-هو ليه فى كل اعلان بيعملوا مظاهرة كلامية عن"التغيير الفظيع الشنييع اللى حصل فى المنتج،أو الهدية الرهييييبة اللى حاطينها مع المنتج، أو الزيادة العجيييييبة اللى حصلت للمنتج،وأحيانا...المنتج نفسه"؟

والآن مع حفل توزيع جوائز إعلانات التليفيزيون والراديو لعام 2009


أحسن إعلان تليفزيون: طبعا اعلان كوكاكولا"عشان تعرفوهم...روحوا شجعوهم"مناصفة مع اعلان بيبسى بتاع كاس القارات"بتاع المذيع اللى بيترجم غلط" أصل المذيع شبه واحد صاحبى

أحسن اعلان راديو:مش عارف لأن اللإعلانات كلها زى بعض فى الراديو

أسوأ إعلان تليفزيون: شيفروليه الدبابة"الدبااااااااااااابة" الشهير بـ"العربية اللى حيلتى باااظت"

أسوأ إعلان راديو: إعلان لإحدى شركات الأبواب"ياخارجة من باب الحماااام وكعب باب الحمام بايش،بايش بايش بايش بايش"

أكتر إعلان اتعرض" إعلان سيراميكا رويال بتاع مهند
kingdom of beauty

أكتر اعلان راديو اتسمع"فودافون الخمسة صاغ"


وحتى نلتقى العام القادم"اللى هو الأسبوع القادم"

اقعدوا بالعافية

١٨ ديسمبر ٢٠٠٩

what happened?

مساء الخير

معندناش موضوع معين النهاردة ، فـ هنتكلم شوية عن كام حاجة كده لاحظتها اليومين دول، وقولولى رأيكم

- النهاردة فى جرنان الدستور قريت اعلان فى الصفحة الأولى، هو المفروض انه نداء شعبى لإقامة حملة على شركة فرانس تيليكوم( اللى عايزة تشترى أسهم موبينيل فى البورصة )، بيطالب فيها مواطن مصرى-كما وقع صاحب الإعلان- عملاء الشركة ال20 مليون انهم يحولوا للشركتين التانيين "بنفس الأرقام" وهذا فى حالة شراء فرانس تيليكوم للشركة"بحجة ان كده شركات الاتصالات المصرية هاتبقى فى أيد الأجانب...
سيبك من موضوع نفس النمر ده، هو السؤال..مين اللى عمل الإعلان ده؟ وليه؟ وايه استفادته من عدم بيع الشركة؟ مستنى إجابة

-لسة برضه بنقول فى انفلونزا الخنازير،الوفيات عدت السبعين حالة ومحدش ناوى ياخد قرار، التطعيم يادوبك عملوا عليه حملة اعلانية واسعة أول ما نزل، وبعدين اختفى...أما عن المدارس...فلاتعليق

-بقالنا كتير ماسمعناش عن مشروع توشكى...ايه أخباره؟

-بصراحة انا كنت ناوى أتكلم عن أحداث عزبة الهجانة اللى فكرتنى بانتفاضة أطفال الحجارة، بس بصراحة برامج التوك شو عملت اللى عليها وزيادة،بس السؤال هنا
اللى رموا طوب دول كانوا الأهالى بجد ولا لأ؟

يلا كفاية لحد كده عشان ماطولش عليكم

وحتى نلتقى الأسبوع القادم...
اقعدوا بالعافية

١١ ديسمبر ٢٠٠٩

الأخوة المدخنين يركزوا معايا

تحياتى

النهاردة الموضوع مهم قوى
عشان هانتكلم مع الأخوة المدخنين
فياريت كل أخ مدخن يولع سيجارته عشان هانعوزها
طيب، أنا مش هاقول ان التدخين ضار جدا بالصحة ويسبب الوفاة وبيجيب سرطان ولا هاجيبلك صورة واحد فى العناية المركزة زى ما الحكومة عملت، أنا بس هاقول على كام حاجة مش هاياخد باله منها غير المدخن
بص ياسيدى
فى كل علبة سجاير تجد عبارة موحدة"توليفة من أجود أنواع التبغ"، هذه العبارة لاتفرق بين سيجارة بلمونت وكنت، تجدها فى المارلبورو والفايسروى كما تجدها فى الكليوباترا والميريت بلونيها
السؤال بقى...تصدق مين
أقولك انا ياسيدى..ماتصدقش ولا حد فيهم
عارف ليه؟ أقولك
تقريبا مصر مابتزرعش النيكوتين(التبغ أو الطباق) ، فبتستورده خام،
وطبعا لو بصينا لشجرة الطباق، هانلاقىان جزق من أوراقها سليم ونضيف( اللى بيروح لأوروبا والدول المتقدمة) وجزء تانى متعفن الأوراق( اللى بيشرف عندنا).وجدير بالذكر ان الورق المتعفن ده يعتبر أكلة لذيذة جدا لبعض أنواع الفئران
ومن هنا نتكلم
فى السجاير الكليوباترا ( وممكن تلاقى أنواع تانية)، بتلاحظ ان فى نصها كده حاجة صلبة، فى اللى بيقول انها نشارة خشب، واللى بيقول انها فرع تبغ وحطوه زى ماهو، بس السواد الأعظم بيقول انها(ولامؤاخذة) مخلفات الفيران اللى كنا لسه بنتكلم عنها
أقولك حاجة كمان؟
بالنسبة للمدخن المبتدئ تعتبر السيجارة الميريت الاصفر هى العذاب بعينه(اكمنه لسه ماداقش المارلبورو) وذلك لأنها-على حد قوله-بتحرق الزور
طيب ، تفتكروا ايه اللى بيخليه هو و اللى على شاكلته من المراهقين المدخنين يقول كده؟
لو بصيت لجانب العلبة هاتلاحظ ان فى نسبتين، نيكوتين وقطران، النيكوتين عارفينه، بس القطران، هو ده السبب، قطران المارلبورو 12 ملى جرام فى السيجارة ، والميريت حاجة كده قريبة، واخد بالك انا بتكلم عن ايه؟
أيوة، القطران، ( بالفعل اللى هو أحد مشتقات البترول،وبيستخدم مع بعض العناصر الأخرى فى صناعة مانسميه بالأسفلت، أيوة اللى بيسفلتوا بيه الشوارع)
يعنى نقدر نقول لكل مدخن قديم ان القصبة الهوائية بتاعة سعادته اتسفلتت، فياريت يركن عربيته فيها، ولو معندوش عربية يتبرع بيها للحكومة (عشان نحل مشكلة الزحمة)
وكووووووووووول البلاوى السودة اللى انا قلتها دى ولا حاجة من اللى بيتقال،
ياريت أى حد يعرف حاجات تانية يشارك معانا
وأخيرا المراجع عشان محدش يشك فيا:
كتاب شكلها باظت لعمر طاهر
بعض علب السجائر فى السوبر ماركتات
بعض الأقوال لبعض أصدقائى
ودمتم فى رعاية الله

٠٤ ديسمبر ٢٠٠٩

معلش مضطر أقلب المواجع



النهاردة أول جمعة بعد العيد، وحكوميا آخر يوم أجازة فى العيد-
طيب، دلوقتى يتكرر السؤال الذى يظهر قبل نهاية كل أجازة
ياترى الحكومة هاتأجل الدراسة ولا لأ؟
لحد دلوقتى الحكومة مش ناوية تأجل، بس ياترى رد فعل الناس هايبقى عامل ازاى؟
...انا عن نفسى مش عارف، بس ع العموم شكلى كده رايح رايح

امبارح اتلعب فى الدورى مباراتين مهمين-
الأولى كانت بين الأهلى والاتحاد وانتهت بالتعادل 1-1
فى ظل غياب نجوم الأهلى( تريكة ومتعب وبركات) للإصابة
وغياب الباقى عن حالتهم الطبيعية، والدليل ان هدف الأهلى لأحمد حسن من تسديدة برة ال18 لم يتمكن حارس الاتحاد من صدها

التانية كانت بين الزمالك وحرس الحدود
والحرس فاز 2-0
على الرغم من تفاؤل الزمالكاويةبحسام حسن المدير الفنى الجديد، إلا انه فشل فى اجتياز العقبة الأولى أمام الحرس
هو عذره الوحيد انه فى أول مباراة له مع فريقه، ولم يمر بفترة إعداد كباقى المدربين
الاختبار الحقيقى أمام الأهلى يوم الثلاثاء القادم
...لما نشوف

معلش مضطر أقلب المواجع -
من أسبوعين تقريبا (بعد أحداث 18 نوفمبر) شفت ع اليوتيوب أغنية لواحد جزائرى بيقلد شعبان عبد الرحيم، سيبك من انه بيشتم فى مصر( شعبا وحكومة ومنتخبا) ومن انه بيستفز الناس كلها، المشكلة انه مابيعرفش يتكلم باللهجة المصرية

فى مصر 3,5 مليون مدخن، بيصرفوا على السجاير 22 مليون جنيه-
المبلغ ده ممكن نبنى بيه 2200مدرسة ، أو نجوز بيهم 44000 عريس وعروسة وندى كل واحد فيهم نصف مليون جنيه، أو نبنى 22 جامعة دولية معتمدة وتخش التصنيف العالمى
حسبى الله ونعم الوكيل

فى كل سنة دراسية، بناخد فى الجغرافيا ان نسبة الأراضى المزروعة فى مصر 3,5% من مساحة أراضيها
نداء من 19 مليون طالب مصرى للفلاحين ، أرضك بتنده

وختاما، اللهم اجعل بلدنا آمنا مطمئنا، وابعد عنه الوجع والألم والعذاب
ودمتم فى رعاية الله

٣٠ نوفمبر ٢٠٠٩

أفكار طائرة

-أنا مش عارف أكتب حاجة ولا أقول ايه،ومع ذلك أشعر بالرغبة الشديدة فى الكتابة...رغبة تشبه الإدمان،

-ينتابني شعور غير جيد حيال هذا اليوم.. ربنا يستر

-لا أعرف لماذا أستمر فى اتعاب نفسي واتعابكم معى، فمجرد الضغط بالماوس على ذلك الزر الذى يشبه علامة الخطأ، ولكنني لا أستطيع الاقتراب منه، لماذا؟؟ لا أدرى

بمناسبة الخطأ، أتدرى عزيزى القارئ أن من تقرأ كلامه قد يقودك إلى الخطأ إن لم تمتلك الشخصية القوية التي تمنعك من الانجراف مع التيار؟
تمتلكها؟ إذن برافو عليك، فيمكنك الآن أن تقرأ ما تشاء، وتستمع إلى ما يحلو لك دون أن يؤثر فى آرائك عن الحياة...

لا أدرى إذا كان ما أكتب هذيـــانــًا أم جنونـًا ، فكل ما أستطيع إخبارك عنه أنه نابع من عقل كاد أن يـُفقد....

أسئلة خصيمك النبي لانت مجاوب عليها:

  • ليه ليبيا -دونا عن بقية خلق الله- احتفلت بالعيد يوم بدرى؟؟
  • ليه لحد دلوقتى وزارة التعليم مش عايزة تقعد العيال فى بيوتها - مع ان عدد الوفيات وصل 21 حالة؟
  • ايه اللى خلى كذا جروب ع الفيس بوك يقولوا ان الفيفا هاتعيد ماتش مصر والجزائر؟
  • ليه الزمالكاوية صابرين على فريقهم أكتر من كده؟ بصراحة قلبى معاهم، فرقة معندهاش دم والله....
ودمتم فى رعاية الله

٢٦ نوفمبر ٢٠٠٩

كل عيد واحنا بنتكلم..بنتكلم وبس


تحياتى
أولا كل سنة وكـــل المصريين بخير وسعادة ويارب دايما يعوده علينا بالخير
ثانيا الحمد لله على رجوعى للمدونة تانى،ويارب يكون حد بيقراها
النهاردة عشان العيد معانا كوكتييييل من الحكاوى
كلام كتير واقف فى زورى وحالف ليتقال
ف بلاش أخليه يصوم 3 أيام
طيب نتكلم

كل عيد واحنا بنتكلم
-----------------------
-----------------------
المميز فى موقع الفيس بوك عن باقى المواقع التى عرفها الشعب المصرى
انه جمع تقريبا جميع طوائف البشر الاجتماعية،رجالة وستات،شباب وبنات،قرايب واخوات(معلش القافية حكمت)،الأغنياء اللى مايفرقش معاهم ثمن اشتراك بأغلى راوتر وأعلى سرعة،والفقراء اللى برضه مايفرقش معاهم السعر لأنهم بيجيبوها بطريقة غير قانونية(زى وصلة الدش كده)،والطبقة المتوسطة اللى مبقتش متوسطة،فأصبح منها من يعانى من لقمة العيش فهبط إلى مستوى الكادحين من قوى الشعب محدودى الدخل،أو من يحاول التشبه بالأغنياء(يبقى الراجل مقضى حياته فى أغلى الكافيهات الممكنة،والست عايشة قدام بانوراما دراما،والبنت قدام ام بى سى 4 ودبى وان،والواد الصغير معاه موبايل مليان فيديوهات مصارعة،والكبير مقضيها سنكحة مع اصحابه فى سيتى ستارز(كان ذلك قبل كارثة الخنازير)...
كل الأشكال والألوان واللغات والديانات،كل أصناف البشر
كلهم اتجمعوا هنا لهدف واحد بس وهو (الكلام)
مش هنا بس:
الموبايلات والرصيد اللى ع الفاضى والمليان(كلام)
مواعيد مضروبة وأشغال متعطلة بسبب(الكلام)
ولاعجب فى كل ذلك فقدوتنا(المسؤلين يعنى)مابيقولوش غير(الكلام)
الظاهر ان مش الفيس هو اللى مجمع الناس..ده الكلام
إذن فكل سنة واحنا شعب متكلم،وعاشت مصر دولة متكلمة ،وعاش الإنسان المصرى مرتبطا بأغنية صباح المعمرة(ماباخدش منك غير كلام،كلام وبس)

ليه..؟
----------
----------
- ليه كل موسم حج فى وقفة عرفة بيجيبوا تسجيل لعبارة(لبيك اللهم لبيك)نفس التسجيل ونفس الناس اللى بتقول،وكأن السعودية مافيهاش غير دول اللى بيحجوا

- ليه كل اللى بيذاكروا بينجحوا،لكن مش كل اللى بينجحوا بيذاكروا؟

- ليه لما تبقى وظيفة طلباتها متقسمة عليك بالمللى ،تترفض لمجرد ان ابن فلان باشا(اللى هو فى نص امكانياتك لو مش ربع كمان)متقدم معاك؟

- ليه مصر أم الدنيا،مش ستها ولا بالدنيا كلها؟

-ليه محافظ لمحافظة دلتاوية،لما جه يوزع رز ع الغلابة طلع منتهى الصلاحية؟

- ليه المحافظ ده اتحجج ب ان الأكياس اللى قديمة لكن الرز جديد؟

-السؤال ، نصدق مين وليه؟

- ليه العرب بكمية بشرهم، وفلوس بترولهم، ومعادنهم،ومساحات أرضهم ونماذجهم المشرفة مش عارفين يوقفوا جبروت وفتونة دولتين مالهمش تاريخ(واحدة عمرها 61 سنة والتانية 450 سنة)،مع اننا ماحيلتناش غير التاريخ نفتخر بيه(حضارة سبع تلاف سنة منهم 3 فراعنة هما مش أجدادنا أساسا(على فكرة احنا أحفاد العرب مش الفراعنة) و500 مع الإسلام والباقى لم يشهدوا سوى التأخر والتقهقر)..؟

الموضوع سخن؟ نهدى شوية

- ليه لما ولد يحب بنت، البنت بتستنى منه انه يكون أسامة منير(الحب هو مش عارف ايه)،بينما هو عايزها هيفا(تسمحلى ادلعك)؟

- ليه نادى الزمالك متخصص انه ينكد على جماهيره فى المناسبات والأعياد؟؟(الحمد لله انى أهلاوى)

- ليه كل البنات اللى ع الفيس بوك غيروا الجروبس اللى عن ماتش الجزائر وخلوها أسامى وطنية؟؟

و أخيرا..

ليه يا قلبى كل يوم بتحب واحدة؟؟(عمرو دياب)

ودمتم فى رعاية الله

٢٣ أكتوبر ٢٠٠٩

لاشىء يفوق الخبرة..لاشىء يفوق المعاناة مع كاريير


الى أى شخص تسول له نفسه شراء تكييف فى أى وقت... ونصحه شخص ما(أو غرقه بمعنى أصح) انه يشترى كاريير،نصيحة: اوعى تصدقه لأنه عايزلك العذاب والمعاناة
ولو مش مصدق...اسمع ياسيدى
من حوالى عشر سنين،اشترينا جهاز تكييف من شركة شمس (أحد موزعى كاريير) ،وبصراحة كان زى الفل لدرجة ان الجهاز شغال بكفاءة لحد دلوقتى ، والصيانة الدورية لا تزيد عن تنظيف فلاتر مش أكتر
المشكلة حصلت لما قرر السيد الوالد انه يشترى جهاز تانى من الشركة الرئيسية ، وياريته ما قرر...
بابا اشترى الجهاز تقريباً آخر ابريل 2009، ووصلنا يوم 6/5/2009
المشكلة مش فى كده خالص المشكلة فى الآتى
1- أول ما كلمنا بتوع التركيبات جابولنا اتنين مش لابسين لبس الشركة أساسًا (معروف ان الشركات الكبيرة عمالها بيلبسوا زى موحد) واكتشفنا بعدين انهم مش من الشركة أصلا، وان الشركة جايباهم عشان يسدوا العجز فى الموظفين عشان ضغط الشغل ساعتها
طبعاً اتنين مش متدربين على ايد الشركة طبيعى جداً انهم مايركبوش الجهاز صح
وياريت الموضوع كده....
طلع الخرطوم الرئيسى أقصر متر من اللازم ، فكان بيسرب فريون بالهبل ، ده غير انهم ركبوه أساساً غلط وبميل، ف عشان كده كانت فتحة الخرطوم بتبان الصبح

2-كلمنا التركيبات تانى وحولونا على الصيانة، وقعدوا حوالى شهر يكلمونا ويسألونا عن سبب العطل وحصل ايه
وجاء اليوم المنتظر...عمال صيانة كانوا أنيل من بتوع التركيبات و برضه مش لابسين لبس الشركة لنفس السبب. غيروا الخرطوم بواحد تانى أطول( تم هذا الأمر بعد فاصل من المعاناة و محايلة الشركة المصونة عشان يتكرموا ويتعطفوا و يرضوا يغيرولنا الخرطوم)
وشحنوا فريون، وبالظبط نص ساعة والتكييف كان هايغرق الشقة..
3- قعدنا حوالى شهر فى نفس الدوامة من غير ما نشغل الجهاز(لاحظ اننا كنا تقريباً فى شهر 6 أو7 يعنى الحر المظبوط)،وبرضه قعدوا يكلمونا لنفس السبب (عشان يسألونا ايه اللى حصل) وانا احولهم على بابا والديلهم نمرة موبايله، هما يكلموا وانا احول،هما يكلموا وانا احول، لحد مانا وبابا وزهقنا ، وكانت النتيجة...
بابا راح و قلبلهم الشركة، وراح طالع ع المدير (طبعاً ماطلعش مرة واحدة كده، عدى على ييجي 60 واحد قبليه) ولما وصل بالسلامة للمدير حكى له ع الموضوع، والراجل قعد يعتذرله وكده ،وبعدين حددوا ميعاد عشان بتوع الصيانة ييجوا
وأخيراً العمال بتوع الشركة الأصليين جولنا ، اسم الله عليهم وهم لابسين قميص الشركة المقلم...
بس ياريتهم ما جم....بمجرد ما مشيوا كل ما يمكن تخيله من المشاكل اللى بتحصل للتكييف حصلت.
وطبعاً بابا راح ع المدير و حكى له، و مسبش الشركة الا لما جابولنا أشطر واحد فيهم عشان يصلح الجهاز،بس كنا فى آخر الصيف، ف برضه مشغلناهوش.
طبعاً قررنا اننا مانتعاملش مع حد من كاريير تانى، وبقينا نحكى القصة دى لكل اللى نعرفهم ، وادينى باقولكوا تانى أهو
عايز تكييف، اوعى تفكر تروح كاريير

٠٩ أكتوبر ٢٠٠٩

القدوة فى جيلنا..ايه النظام؟؟

بصراحة أنا شايف ان أحد أهم أسباب مشاكلنا كشباب وجيل جديد هو غياب القدوة الحقيقية، يعنى مالناش مثل أعلى نحتذى به، أو تقدر تقول اننا لسة ماخترناش القدوة الصح فى حياتننا.يستثنى طبعَا من الكلام ده بعض الناس اللى عرفوا يلاقوا
الشخص(أو الأشخاص) اللى يدلوهم على حياتهم.
أنا عن نفسى أعتبر نفسى -وبحمد الله- من الأشخاص اللى اختارهم القدر عشان يلاقوا قدوة،يعنى أنا "زى أى مسلم"بتخذ الرسول(صلى الله عليه وسلم)*قدوة فى دينى ،وبتخذ والدى قدوة فى العمل والتنظيم، أما فى الكتابة والتدوين ف شايف ان الكتاب الصحفيين
اللى بيكتبوا فى الصحف المستقلة*(زى ابراهيم عيسى وأسامة غريب-مع حفظ الألقاب طبعا-ً)ممكن يكونوا مثل أعلى لأى شخص عايز يكتب.*
المشكلة مش هنا، المشكلة لما الواحد مايلاقيش قدوة أو يختار شخص غلط عشان يكون مثله الأعلى،لو ملاقاش قدوة ممكن يتصرف ويلاقيها(أصله لو ملاقاش هايعيش لنفسه وبنفسه،وده ممكن يبقى مشكلة عشان هايبقى فريسة سهلة للشيطان يلعب فى دماغه براحته)
المشكلة الحقيقية لما الواحد يتخذ شخص ما كمثل أعلى ليه ،ويكون ابشخص ده مش كويس،لأنه فى الحالة دى هايقلده وتبقى الحكاية مليطة-على رأى اللى قال- مش بس كده ،ده لما يكبر ممكن يطلع ولاده بالصفات اللى خدها من قدوته(الحلوة والوحشة)
وعشان كده لازم الواحد يختار الشخص اللى يتأثر بيه ويختاره كويس قوى زى ما بيختار اصحابه.

١٣ سبتمبر ٢٠٠٩

كتاب حياتى ياعين...ما شفت زيه كتاااب

تعرفوا؟...الواحد لما بيفتكر تفاصيل حياته (أو بمعنى أدق بيحاول يفتكرها،ده اذا افتكرها أساسًا-هانتكلم فى الموضوع ده بعدين-)
المهم، لما بيفتكر الأحداث اللى حصلتله فى عمره، بيحس انه بيتفرج على فيلم وثائقى( من الجماعة القصيرين دول) ، وساعات بيفتكر حاجات مابيحبش يفتكرها ، يمكن عشان محرجة أو محزنة وكده يعنى ، ويحاول على قد ما يقدر مايفتكرهاش ويحاول ينساها.
بس المشكلة ان الواحد بيحس أحياناً ببعض الذكريات التى لاتريد أن تنمحى من ذاكرة المرء، بالعربى كده مش قادرة تطلع من نافوخه،بيبقى مخنوق انها لسه معاه،وبيكره انها تكون موجودة فى خياله أو ذاكرته أو كل ما يمت له بصلة...
ومع مرورى بالتجربة دى كتيييييييييير قوى، اكتشفت انها بتروح مع الوقت، وبيختفى أثرها عند سماع أول خبر حلو أو حاجة تضحك،لأن الذكريات الكئيبة الخنيقة دى عاملة زى الضلمة، بتختفى مع أول شعاع نور يدخل المكان، وبتروح وتذهب مع الريح وكأنها لم تكن.......
يعنى م الآخر لازم الواحد يبسط نفسه على قد ما يقدر، لأنه لو فضل سعيد الذكريات الأليمة و الشعور الكئيب مش هايلاقوا مكان فى حياته، عشان الذكريات الحلوة والسعادة بيبقوا ماليين حياتك، مش كده ولا إيه؟
بس كده...